Во октомври и декември 2024та година, се одржаа првите две изданија на работилницата за личен развој низ игра со поезија „АМАЛГАМ“. Замислени како безбедни, колаборативни средини за себеистражување низ експерименти со различни форми на рециклирана поезија, овие работилници на учесниците им пружија алатки за создавање рефлексивна поезија во која можат да ги изразат своите внатрешни доживувања и да ги споделат со другите – без оглед на тоа дали имаат претходно искуство со пишување поезија.
Пишувањето поезија не секогаш мора да биде обид да се напише нешто совршено или генијално. Тоа може да биде и слободна игра, релаксирачка активност, опуштено пловење низ фантазијата која ја поседува секој, спонтано истражување на правецот во кој нѐ води мислата, без страв од грешки и без притисок дека делото мора да се допадне било кому. Играта со рециклирана поезија е добар начин да се примени игривост и спонтаност во создавањето поезија и овозможува основа за формирање креативна навика која може да го поттикне или придружува личниот развој.
Рециклираната (found) поезија е збир на креативни техники кои вклучуваат употреба на постоечки текст од извори како книги, написи, текстови на песни, реклами, памфлети, билборди и слично. На традиционален или дигитален начин, зборовите и фразите од овој текст се реаранжираат во поема – парченца постоечки јазик се поврзуваат на оригинални начини за да создаде ново значење.
Колаж поезијата е најчесто користената форма на рециклирана поезија. Во традиционалната форма на оваа техника, учесниците можат да исечат зборови од најразлични пишани извори, да ги уредат во нови мисли кои изразуваат некоја нивна лична вистина на празен лист хартија и да ги илустрираат со цртежи, слики, текстури и други визуелни елементи.
Блекаут поезијата, или редактирана поезија, е еден од облиците на рециклирана поезија кој ужива голема популарност поради својата едноставност, пристапност и неограничен потенцијал за креативен израз. Името доаѓа од терминот blacking out, односно зацрнување на текст. Некои од раните влијанија кои придонеле за создавање на блекаут поезија потекнуваат од 18тиот век, кога креаторите на сатирични дела ги редактирале весниците за да го трансформираат текстот во нова содржина, и раниот 20ти век, кога дадаистите експериментирале со неконвенционални уметнички форми за да ги предизвикаат традиционалните сфаќања на литературата и уметноста.
Програмата на првата работилница опфати три етапи: слободна колаж поезија, блекаут поезија со избор на материјали, и блекаут поезија со еден ист материјал за сите. Идејата позади ова е да се почне со максимум избор и слобода, а да се заврши со најголемо ограничување. Ограничувањата во овој случај се корисни зашто нѐ тераат на вистинска креативност за да ги надминеме. Притоа, учесниците можеа слободно да ги изберат темата, стилот, должината и количината на изработени поеми. На крајот на работилницата, се одржа поетско читање на сите дела, кое им овозможи на некои од учесниците првпат да прочитаа нешто свое пред публика во пријателска атмосфера и да доживеат искрена поддршка. Читањето беше проследено со дискусија насочена кон интроспекција, истражување на чувствата кои се појавиле во текот на создавање на делата, и поврзување на темите и техниките со значајни аспекти на личните животи на учесниците.
„АМАЛГАМ“ е редовна работилница која ќе се одржува еднаш месечно во просториите на Центарот за психологија Алхемиа. Поканети се сите кои сакаат да размислуваат на нови начини. До скоро! 🦩
