Никој не се раѓа срамејќи се од своето тело – или пак гордеејќи се со него. Како доаѓаме до овие ставови?
На оваа работилница, која се одржа на 25.01.2025 во Центарот за психологија Алхемиа под водство на психолозите Марија Грубор и Ана Тодоровска, дискутиравме за сликата за своето тело и пораките кои влијаеле на нејзиното создавање низ прашања како „Како е да се биде во моето тело?“, „Каде ги научив критиките кои секојдневно му ги упатувам?“ и „Кој е најапсурдниот совет поврзан со телото што некогаш ми го дале?“
Сликата за нашето тело се протега надвор од неговите физички граници и здравствен статус – таа е обликувана од општествени сили кои умеат да го искриват нашиот однос кон телото во насока на негативни последици врз нашата добросостојба. Но, социјалните и културните норми не се објективна и апсолутна вистина. Оттука, прашањето е, дали сме спремни за промена?
Благодарност до присутните за отворениот разговор кој ни овозможи да научиме многу едни за други и да увидиме дека предизвиците во прифаќањето на своето тело се универзални во доба на презаситеност со нормативни пораки од околината – но способни сме да ги надминеме со критичко преиспитување, себесочувство и взаемна поддршка и почит.
