Каков би бил нашиот живот кога би му пружиле валидација, прифаќање и благодарност на своето тело и неговите способности?
„Мое тело, моја приказна“ е циклус на искуствени работилници посветени на односот кон телото како димензија на менталното здравје. Низ интерактивни и креативни активности, овие работилници ќе ги предизвикаат нашите перцепции на телото, нормите околу телесното изразување, предрасудите кон „несовршените“ тела и нереалните очекувања поврзани со „идеалните“ тела.
Работилниците се организирани од Здружението за психологија и експресивна арт терапија Вивид ЕАТ и Центарот за психологија и психоедукација Алхемиа, и поврзани со интернационалниот Erasmus+ проект BODYkind. Фасцилитатори: Ана Тодоровска и Марија Грубор, лиценцирани психолози и сертифицирани едукатори за работа на теми поврзани со телото.
Првата работилница наменета за млади се одржа на 25.07.2024 во EU House – Велес, и во неа беа опфатени теми како телесна свесност, идентитет, стереотипи, и грижа и благодарност кон телото.
Ова се важни теми во животот на секој човек, но можеби особено за младите луѓе. Создавањето на безбедни места за споделување на искуствата и потребите поврзани со телото е нашиот придонес кон унапредување на индивидуалната и колективната добросостојба.
