Придружете ни се на третата работилница од циклусот „Мое тело, моја приказна“, посветена на комплексниот однос меѓу нашите тела и општеството и неговиот израз во јавниот простор. Овој пат ќе поминеме низ искуствени вежби околу тоа како телото се перципира, претставува и ограничува во јавната сфера, почнувајќи со едноставното прашање:
Како се чувствувам во сопствена кожа кога сум надвор од дома?
Нашето телесно учество во јавниот простор е под влијание на мноштво видливи и невидливи социјални фактори, кои заслужуваат да бидат преиспитани. Иако можеби ретко помислуваме на тоа, потребите, очекувањата, нормите и стравовите кои ги носиме со себе кога навигираме низ јавни ситуации се одразуваат и на нашето ментално здравје.
Дали сте забележале на кои места се чувствувате слободно, а на кои претерано самосвесно? Дали некогаш сте добиле коментари од околината во врска со вашето тело кои предизвикале да го промените начинот на кој изгледате и се однесувате во јавност?
Оваа работилница е безбеден простор за сите ваши искуства. Во свет кој постојано нѐ евалуира и дефинира врз основа на изгледот, инклузивноста, автентичноста и меѓусебната поддршка се суштински предуслови за добросостојба. Ајде да ги истражиме и редефинираме правилата!
